Мегаполистен 50 шақырым жерде орналасқан елді-мекенде 38 мыңнан астам адам тұрады. Алайда,ауылдың 50 пайызында жол жоқ. Тұрғындардың сөзінше, айнала жазда шаңға, ал көктем, күзде ми батпаққа айналып, жаяу жүруге мүмкін болмай қалады, деп хабарлайды Alataunews.kz ақпарат агенттігі kaztrk.kz-ке сілтеме жасап.
«Әкімдік бізге асфальт салынады деп айтқалы 4-5 жыл болды. Құжаттарды көтерсе, төрт рет асфальт салынды, осы жолы бесінші рет деді. Ал мен туып өскелі мына жерде асфальт көрген емеспін», – деді ауыл тұрғыны Сәуле Өмірбаева.
Аудан әкімдігі жол құрылысымен айналысатын мердігер компаниямен келіссөздер жүргізген. Құжат бойынша, осы ауылға биыл шілдеде тас жол төселуі керек еді. Бірақ, жоба жүзеге аспай отыр.
«Бірінші су құбырларын ауылды толық қамтып алғаннан кейін барып жол жұмыстарына кірісеміз деген жоспар болған. Мердігер компаниямен келісімшартқа отырдық. Жұмысты аяқтау 31 қазан айына дейін, жол жұмыстарын жүргізіп беруі керек», – Қарғалы ауылы әкімінің орынбасары Бауыржан Бәшіров.
Ал Қарғалы ауылындағы жол құрылысының кешеуілдеуіне басты себеп – битум тапшылығы дейді компания өкілдері. Жылдар бойы жол азабын тартқан қарғалылықтарға күтуден басқа амал жоқ. Өйткені, жұмыстар кейінге қалдырылды.
