Кездесу барысында тараптар сауда-экономикалық байланыстарды кеңейту, инвестиция тарту, инновациялық технологияларды енгізу, сондай-ақ білім және мәдениет салаларындағы ынтымақтастықты дамыту мәселелерін талқылады.
Қазіргі уақытта Алматы облысында америкалық капиталдың қатысуымен тоғыз кәсіпорын жұмыс істейді. Өткен жылы өңір мен АҚШ арасындағы тауар айналымы 81 млн доллардан асқан. Америкадан негізінен автомобильдер, көлік құралдарының қосалқы бөлшектері, фармацевтикалық өнімдер мен косметика импортталады. Облыс әкімі Шыңғыс Әрінов өңірдің шетелдік инвесторлармен ынтымақтастықты кеңейтуге мүдделі екенін атап өтті.
«Соңғы үш жылда облыс шет мемлекеттердің 18 өңірімен ынтымақтастық орнатып, тиісті келісімдерге қол қойды. Осыған байланысты АҚШ штаттарының бірімен тікелей өңіраралық әріптестік орнатуға ерекше мүдделіміз. Бұл нақты жобалар мен тың бастамаларды іске асыруға жол ашады», – деді облыс әкімі.
Сондай-ақ аймақ басшысы америкалық инновациялық технологияларды өңірдегі өндіріс орындарына енгізу маңызды екенін жеткізді. Бұл бағытта ғылыми-зерттеу институттарымен және мемлекеттік органдармен бірлескен жұмысты дамыту көзделіп отыр.
Өз кезегінде АҚШ-тың Бас консулы Питер Кауфман Қазақстан мен Америка арасындағы экономикалық байланыстардың нығайып келе жатқанын айтты. Оның мәліметінше, соңғы алты жылда екі ел арасындағы сауда көлемі екі есеге өсіп, Қазақстанға 17 млрд доллар инвестиция салынған.
«Біз Алматы облысы мен АҚШ арасында ынтымақтастық орнату идеясын қолдаймыз. Қазіргі таңда мұнда АЭС, «Алатау сити» сияқты жобалар қолға алынғанын білеміз. Бұл бастамаларға инвесторлардың қызығушылығы жоғары», – деді Питер Кауфман.
Бас консул алдағы уақытта білім, мәдениет және инвестиция салаларындағы бірлескен жобаларды дамытуға қолдау көрсетуге дайын екенін білдірді. Кездесу қорытындысында тараптар өзара ынтымақтастықты нығайтып, жаңа инвестициялық бастамаларды жүзеге асыру бағытындағы жұмысты жалғастыруға келісті.





