Жаңа заң талаптары сыбайлас жемқорлықтың алдын алуға, мүдделер қақтығысын бақылауды күшейтуге және қылмыстық жауапкершілік аясын кеңейтуге бағытталған.
Атап айтқанда, бұдан былай параны нақты беру немесе алу фактісі бойынша ғана емес, оны ұсыну, беруге уәде ету немесе талап ету кезінде де қылмыстық жауапкершілік туындайды. Сонымен қатар жеке тұлғаларды сыбайлас жемқорлық сипатындағы құқық бұзушылықтар үшін әкімшілік жауапкершілікке тарту мерзімі бір жылдан үш жылға дейін ұзартылады.
Заңнамадағы тағы бір маңызды өзгеріс – туыстардың бір мемлекеттік органда жұмыс істеуіне қатысты шектеулердің күшейтілуі. Енді мекеме басшысының қызметтік ықпалы болған жағдайда оның жиендері, қайын жұрты мен өзге де жекжаттарының бір мекемеде жұмыс істеуіне шектеу қойылады. Алайда бұл талап бұрын жұмысқа орналасқан азаматтарға қолданылмайды.
Сондай-ақ мүдделер қақтығысы туындаған жағдайда кадр қызметі екі жұмыс күні ішінде мекеме басшысына жазбаша хабарлауға міндетті болады.
Мемлекеттік және квазимемлекеттік секторларда цифрлық кадрлық бақылау жүйесі енгізіледі. Жаңа жүйе туыстық және кәсіпкерлік байланыстарды автоматты түрде тексеріп, жасырын мүдделер қақтығысын анықтауға мүмкіндік береді.
Бұдан бөлек, Қазақстанда сыбайлас жемқорлыққа қарсы күрестің жаңа бесжылдық стратегиясын әзірлеу жоспарланған.
Аталған өзгерістер мемлекеттік органдар қызметінің ашықтығын арттыруға, жемқорлық тәуекелдерін азайтуға және құқық бұзушылықтардың алдын алуға бағытталған.





