Жоба аясында саяжай алқабындағы ауызсу инфрақұрылымы жаңартылып, тұрғындарға орталықтандырылған су жүйесін пайдалануға мүмкіндік жасалды. Құрылыс жұмыстарына бюджеттен 1,7 млрд теңге бөлінген.
Айта кетейік, Іле ауданында халық санының өсуіне байланысты инженерлік инфрақұрылымды дамыту өзекті мәселелердің біріне айналған. Әсіресе, тұрғындар тұрақты қоныстана бастаған саяжай алқаптарын ауызсумен және басқа да коммуналдық қызметтермен қамтамасыз етуге басымдық берілуде.
Қазіргі уақытта Көкқайнар, Жапек батыр, Асқар Тоқпанов және Жайнақ ауылдарының бас жоспарлары бекітілген. Аталған елді мекендердің шекарасына 61 саяжай алқабы енгізілді. Ал қалған 49 саяжай алқабын ауылдар құрамына кезең-кезеңімен қосу жоспарланып отыр.
Осылайша, «Жомарт» саяжай алқабында жүзеге асырылған жоба нәтижесінде шамамен 6 мың тұрғын орталықтандырылған ауызсу жүйесіне қол жеткізді. Бұл елді мекеннің коммуналдық инфрақұрылымын жақсартуға бағытталған маңызды қадамдардың бірі болды.





