Қарасай ауданының прокуратурасы Алматы облысы білім басқармасына қарасты «Облыстық №3 арнайы мектеп-интернаты» коммуналдық мемлекеттік мекемесінде бюджет қаражатының жұмсалуына қатысты заңбұзушылықты анықтады.
Тексеру барысында мекеме директоры, оның орынбасары және бас бухгалтері іс жүзінде жұмыс істемейтін адамдарды жалған қызметке орналастыру арқылы мемлекет қаржысын заңсыз иемденгені белгілі болды. Осы тәсілмен жалпы сомасы 5,8 миллион теңге бюджет қаражаты жымқырылған.
Анықталған деректер бойынша прокуратура материалдарының негізінде Қазақстан Республикасы Қылмыстық кодексінің 189-бабы – «Сеніп тапсырылған бөтен мүлікті иемденіп алу немесе талан-таражға салу» бойынша сотқа дейінгі тергеп-тексеру жүргізілді.
Қылмыстық іс сотта қаралып, мекеме директоры, оның орынбасары және бас бухгалтері кінәлі деп танылды. Сот үкімімен олардың әрқайсысына әртүрлі жаза тағайындалды. Алайда нақты қандай жаза қолданылғаны туралы мәлімет берілмеді.
Қарасай ауданының прокуратурасы кәмелетке толмағандардың құқықтарын қорғау, білім беру ұйымдарындағы заңдылықтың сақталуын қадағалау және бюджет қаражатының мақсатты әрі заңды жұмсалуын қамтамасыз ету бағытындағы жұмыстарды жалғастыратынын хабарлады.
