Жиынға Санитариялық-эпидемиологиялық бақылау департаментінің, Ұлттық сараптама орталығы филиалының, Дезинфекция орталығының, Талдықорған обаға қарсы күрес станциясының және «AQNIET» кәсіподағының басшылары мен қызметкерлері қатысты.
Кеңес барысында өңірдегі санитариялық-эпидемиологиялық ахуалға баға беріліп, алдағы кезеңге арналған басым міндеттер айқындалды. Негізгі назар цифрлық технологияларды енгізу арқылы халықтың санитариялық-эпидемиологиялық саламаттылығын қамтамасыз етуге аударылды.
Жауапты мамандардың мәліметінше, қазіргі уақытта Алматы облысында санитариялық-эпидемиологиялық жағдай тұрақты. Салаға жүктелген тапсырмалар толық орындалған. Инфекциялық аурулар мен биологиялық қауіптердің алдын алуда Ұлттық сараптама орталығының зертханалық қызметтері, Дезинфекция орталығы және обаға қарсы күрес станциясы бірлесіп жұмыс жүргізуде.
Жиында тұрғындардың өтініштерін қарау сапасын арттыру мәселесі де көтерілді. Атап айтқанда, e-Otinish ақпараттық жүйесі арқылы келіп түсетін өтініштер мен мемлекеттік қызметтер көлемінің артып отырғаны айтылды. Бұл жүйе азаматтардың мәселелеріне жедел ден қоюға, өтініштерді белгіленген мерзімде қарауға және артық әкімшілік рәсімдерді қысқартуға мүмкіндік береді.
Сонымен қатар денсаулық сақтау инфрақұрылымын жаңғырту мәселесіне ерекше назар аударылды. Мемлекет басшысы Қасым-Жомарт Тоқаевтың Жолдауында белгіленген міндеттер аясында өңірде медициналық және профилактикалық нысандарды дамытуға басымдық берілмек. «Халықтық құрылыс» бағдарламасы шеңберінде денсаулық сақтау мекемелерін салу және жаңғырту жұмыстары қарастырылуда.
Кеңесте санитариялық-эпидемиологиялық бақылау жүйесін цифрландырудың маңыздылығы да атап өтілді. Заманауи ақпараттық технологиялар мен талдау құралдарын енгізу бақылау рәсімдерінің ашықтығын қамтамасыз етіп, мемлекеттік қызметтердің тұрғындар мен кәсіпкерлер үшін қолжетімділігін арттыруға бағытталған. Сондай-ақ цифрлық шешімдер бюджет қаражатын тиімді пайдалануға және негізсіз шығындарды азайтуға ықпал етпек.
«Өңірдегі санитариялық-эпидемиологиялық саламаттылық пен облыстың әрбір тұрғынының денсаулығы – қызметтердің өзара үйлесімді жұмысының және азаматтардың мүддесін басты орынға қоюдың тікелей нәтижесі», – деді облыс әкімінің орынбасары Қуаныш Бақытұлы.
Кеңейтілген кеңес аясында Республика күніне орай санитариялық-эпидемиологиялық қызметтің дамуына елеулі үлес қосқан, кәсіподақ жұмысына және кәсіби байқауларға белсенді қатысқан қызметкерлер марапатталды.
Жиын қорытындысында өңірдегі эпидемиологиялық тұрақтылықты сақтау, профилактикалық шаралардың тиімділігін арттыру, цифрлық бақылау жүйелерін жетілдіру және тұрғындарға көрсетілетін қызмет сапасын жақсарту бағытындағы жұмыстарды жалғастыру қажеттігі атап өтілді.
