Мемлекет басшысы Жолдау барысында Алатау қаласын дамыту және инвесторлар үшін қолайлы құқықтық орта қалыптастыру мәселесіне ерекше тоқталды. Президенттің айтуынша, Алатау қаласы еліміздің инвестициялық және кәсіпкерлік әлеуетін арттыратын маңызды орталықтардың біріне айналуға тиіс.
«Инвестиция мен кәсіпкерлікке қолайлы орта қалыптастыруды көздейтін, қарқынды дамитын Алатау қаласын салудың орасан зор маңызы көпшілікке айқын болды деп ойлаймын», – деді Қасым-Жомарт Тоқаев.
Мемлекет басшысы халықаралық инвестицияларды тартуда тиімді сот жүйесінің маңызы зор екенін атап өтті. Оның сөзінше, инвесторлардың сенімін арттыру үшін әділ әрі сапалы сот төрелігін қамтамасыз ету қажет.
«Кез келген халықаралық юрисдикцияның ұзақ мерзімді тартымдылығының басты шарты – тиімді сот төрелігі. Сондықтан Алатау қаласында сот төрелігінің жоғары сапасын қамтамасыз ететін сот жүйесін құру қажет», – деді Президент.
Қасым-Жомарт Тоқаевтың мәлімдеуінше, Алатау қаласында ағылшынның жалпы құқық үлгісіне негізделген Инвестициялық сот коммерциялық істерді қарайтын болады. Ал қаланың арнайы құқықтық режиміне қатысты өзге мәселелер Азаматтық соттың құзыретіне беріледі. Бұл бастама инвесторлардың құқықтарын қорғауға, коммерциялық дауларды тиімді шешуге және халықаралық бизнес үшін қолайлы жағдай қалыптастыруға бағытталған.
Президент Алатау қаласының арнайы құқықтық режимін жетілдіру үшін заңнамалық өзгерістер енгізу қажеттігін айтты.
Осыған байланысты Үкіметке 2027 жылғы қаңтар айының соңына дейін «Алатау қаласының арнайы құқықтық режимі туралы» Конституциялық заңға тиісті түзетулерді Құрылтайдың қарауына енгізу тапсырылды.
Мемлекет басшысы инвесторлардың құқықтары мен заңды мүдделерін қорғау мемлекеттің басты міндеттерінің бірі екенін атап өтті.
«Барлық іскер әрі адал кәсіпкерлердің инвестициялық мүдделері ең күшті әрі сенімді құқықтық қорғау тетігі – Конституциямен кепілдендірілгенін еске салғым келеді», – деді Қасым-Жомарт Тоқаев.
Осылайша, Алатау қаласында арнайы сот жүйесін қалыптастыру және құқықтық режимді жетілдіру арқылы инвестициялық тартымдылықты арттыру көзделіп отыр.
Жаңа бастама Алматы облысының экономикалық дамуына серпін беріп, өңірге отандық және шетелдік инвестицияларды тартуға қосымша мүмкіндік ашуы мүмкін.
