№2 Ақтөбе қалалық соты үкімді қоныс колониясында оқыды.
Іс материалына сүйенсек, қылмысқа қатысы бар жеке тұлғаларға ҚР ҚК-нің «Заңсыз кәсiпкерлiк, заңсыз банктік, микроқаржылық немесе коллекторлық қызмет», «Қаржылық пирамиданы құру және оған басшылық ету», «Ұйымдасқан топ, қылмыстық ұйым құру және оларға басшылық ету, сол сияқты оларға қатысу», «Алаяқтық» баптары бойынша айып тағылды.
Ресми мәліметке сүйенсек, сотталушы Ж. Есіркепов 2018 жылдан бастап салымшылардың 30 миллиард теңгеден астам қаржысын жымқырған. 48 адамнан құралған топтың ісі 3 786 томнан тұрады.
«Ж. Есіркепов, Н. Танбашев айыпты деп танылып, түпкілікті 18 жылға бас бостандығынан айыру жазасы кесілсін. Олар қаржы, коммерциялық ұйымдарда 10 жыл басқарушы қызметін атқара алмайды. Мүлкі тәркіленеді», — деді судья Сейфулла Тасымбетов.
Ұйымдасқан қылмыстық топтың басқа мүшелері 7 жылдан 13 жылға дейін бас бостандықтарынан айырылды.
№2 қалалық соты баспасөз қызметінің хабарлауынша, келесі сот үкімі 31 тамыз күні жария етіледі.
