Су ресурстары және ирригация министрі Нұржан Нұржігітов Алматы облысының Еңбекшіқазақ ауданына жұмыс сапарымен барып, Д. Қонаев атындағы Үлкен Алматы каналының учаскелерінде жүргізілген реконструкция жұмыстарының нәтижесімен танысты.
Биыл каналдың апатты жағдайдағы, жалпы ұзындығы 1,53 шақырым болатын учаскелерін қайта жаңғырту жұмыстары аяқталды. Су шығынын азайтып, 33,3 мың гектар егістік алқапты тұрақты әрі сапалы суару үшін канал арнасы монолитті темірбетонмен қапталған.
Атқарылған жұмыстармен танысқан министр Су шаруашылығы комитетіне нысанды пайдалануға түпкілікті қабылдау алдында мұқият тексеруді тапсырды.
«Келесі жылдың вегетация кезеңіне дейін каналдың толық дайын болуын қамтамасыз ету қажет. Ауыл шаруашылығы тауарын өндірушілерге су жеткізуде ешқандай мәселе болмауы керек. Сонымен қатар Үлкен Алматы каналының басқа учаскелерін реконструкциялауға қажетті құжаттарды әзірлеу жұмыстарын уақытылы аяқтау қажет», – деді Нұржан Нұржігітов.
Министрлік Үлкен Алматы каналын үш кезеңмен реконструкциялауды жоспарлап отыр. Бірінші бағыт бойынша ұзындығы 15,6 шақырым болатын учаскені бетондау жобасы әзірленген.
Сонымен қатар жалпы ұзындығы 110 шақырым болатын өзге учаскелерді қайта жаңғыртуға қажетті құжаттар дайындалып жатыр. Үшінші кезеңде Үлкен Алматы каналының бас су құрылысын жөндеу көзделген.
Министрліктің мәліметінше, ауқымды реконструкция каналдың су өткізу мүмкіндігін жобалық көрсеткішке дейін жеткізуге және Алматы облысындағы суармалы жерлерді сумен қамтамасыз ету сапасын жақсартуға мүмкіндік береді.
