Қазақстан құрамасы сапында Данияр Почивалов, Алишер Айсалбаев және Марк Почивалов өнер көрсетті. Біліктілік кезеңінде қазақстандық мергендер 348 ұпай жинап, үшінші орынға тұрақтады. Кувейт құрамасы 355 ұпаймен алтын, Катар спортшылары 349 ұпаймен күміс жүлдеге ие болды.
Қола жүлдегерлердің бірі – Алматы облысының спортшысы Данияр Почивалов. Халықаралық дәрежедегі спорт шебері «трап» дисциплинасына маманданған. 22 жастағы мерген бұған дейін 2023 жылғы әлем чемпионатында қола жүлде иеленіп, ұлттық және халықаралық жарыстарда бірнеше рет үздіктер қатарынан көрінген.
Азия ойындарында Данияр Почивалов жеке бәсекеде де жоғары нәтиже көрсетті. «Трап» біліктілігінің алғашқы күнінде ол 48 нысананы дәл көздеп, үшінші орынға шықты. Екінші күн қорытындысында 93 ұпай жинады.
Командалық есептегі қола жүлде – спортшының халықаралық аренадағы кезекті жетістігі. Сонымен қатар бұл нәтиже Алматы облысының спортшылары ұлттық құрама сапында ел намысын абыроймен қорғап жүргенінің тағы бір көрінісі болды.
Тоғызыншы жарыс күнінің қорытындысы бойынша Қазақстан құрамасының қоржынында 45 медаль бар: 9 алтын, 13 күміс және 23 қола. ХХ жазғы Азия ойындары Жапонияда 4 қазанға дейін жалғасады.
