Қазақстан Республикасы Мемлекеттік қызмет істері агенттігінің Алматы облысы бойынша департаменті мемлекеттік қызмет көрсету сапасына қатысты азаматтардың өтініштерін зерделеп, анықталған заң бұзушылықтарды жою және қызмет алушылардың құқықтары мен заңды мүдделерін қалпына келтіру бағытында жұмыс жүргізіп келеді. Ағымдағы тоқсанда қаралған өтініштердің екеуі атаулы әлеуметтік көмек пен көші-қон саласына қатысты болған.
АӘК тағайындау кезінде қандай кемшіліктер анықталды?
Бірінші жағдайда азамат атаулы әлеуметтік көмек тағайындаудан бас тарту туралы шешімге шағымданған.
Өтінішті қарау кезінде АӘК тағайындауға берілген өтініш, отбасының материалдық жағдайын тексеру актісі, комиссия қорытындысы, ақпараттық жүйелердегі мәліметтер және басқа да қажетті құжаттар зерделенген.
Тексеру нәтижесінде отбасының материалдық жағдайын бағалау кезінде барлық мән-жайдың толық әрі объективті зерттелмегені анықталды.
Атап айтқанда, комиссия азаматтың көрсетілген мекенжайда тұрмайтыны туралы қорытынды жасаған. Алайда мұндай тұжырымды растайтын объективті құжаттық дәлелдер болмаған.
Комиссия алғаш барған кезде азаматтың үйде болмауы оның сол мекенжайда тұрмайтынын білдірмейтіні ескерілген. Кейін қайта тексеру жүргізілген кезде азамат комиссия мүшелерін қабылдаған.
Сонымен қатар комиссия жұмысының тәртібіне қатысты да мәселе анықталған. Оның бекітілген құрамында жеті адам болғанымен, алғашқы зерделеуге тек екі мүшесі қатысқан.
Нәтижесінде азаматтың шағымында көрсетілген уәждердің бір бөлігі негізді деп танылды. Анықталған кемшіліктерді жою, азаматтың бұзылған құқықтарын қалпына келтіру және АӘК тағайындау туралы өтінішті заң талаптарына сәйкес қайта қарау жөнінде шаралар қабылдау көзделді.
Көші-қон қызметінде мерзім 35 күнге бұзылған
Екінші өтініш шетелдік азаматқа Қазақстан Республикасында тұрақты тұруға рұқсат беру жөніндегі мемлекеттік қызметке қатысты.
Департамент осы жағдай бойынша жоспардан тыс тексеру жүргізген. Нәтижесінде азамат құжаттарын алғаш ұсынған кезде олар кері қайтарылғаны, алайда құжаттарды қабылдаудан немесе мемлекеттік қызмет көрсетуден бас тартудың нақты себептері жазбаша түрде көрсетілмегені белгілі болды.
Кейін қажетті құжаттардың толық топтамасы қабылданғанымен, мемлекеттік қызмет көрсету мерзімі сақталмаған.
Қолданыстағы талаптарға сәйкес, бұл қызмет 45 күнтізбелік күн ішінде көрсетілуге тиіс. Алайда нақты жағдайда қызмет көрсету мерзімі 35 күнтізбелік күнге бұзылған.
Тексеру нәтижелері тиісті органға жолданып, заң бұзушылықтарды жою, қызмет алушының бұзылған құқықтарын қалпына келтіру және мұндай жағдайлардың қайталануына жол бермеу қажеттігі көрсетілген.
Сонымен қатар жауапты лауазымды тұлғалардың әрекеттеріне құқықтық баға беру және тәртіптік жауапкершілік мәселесін қарау қажеттігі көтерілді.
Азаматтар өз құқықтарын білуі керек
Мемлекеттік қызмет көрсету басқармасының бас маманы Динара Әлібекқызының айтуынша, мемлекеттік қызмет көрсету кезінде жіберілген кез келген кемшілік азаматтың құқықтары мен заңды мүдделеріне әсер етуі мүмкін.
Сондықтан мемлекеттік орган қабылдайтын шешім нақты деректерге негізделіп, барлық рәсім заң талаптарына сәйкес жүргізілуге тиіс. Ал бақылаушы органның міндеті – заң бұзушылықтарды анықтаумен ғана шектелмей, олардың себептерін зерделеп, азаматтың бұзылған құқығын қалпына келтіруге ықпал ету.
Мамандар азаматтарға мемлекеттік қызмет алу кезінде өз құқықтарына назар аударуға кеңес береді. Егер қызмет көрсету мерзімі бұзылса, құжаттарды қабылдау тәртібі сақталмаса немесе мемлекеттік органның шешімі заң талаптарына сәйкес емес деп есептелсе, азамат белгіленген тәртіппен шағымдануға құқылы.
Департамент өкілінің сөзінше, мұндай өтініштер мемлекеттік қызмет көрсету жүйесіндегі нақты мәселелерді анықтап қана қоймай, қызмет сапасын жетілдіруге де мүмкіндік береді. Азаматтардың құқықтарын қорғау мемлекеттік қызмет сапасының негізгі өлшемдерінің бірі саналады.
