Бәсеке Қарасай аудандық №1 балалар мен жасөспірімдер спорт мектебінде ұйымдастырылды. Қатысушылар ұлдар мен қыздар арасында төрт жас санаты және 25 салмақ дәрежесі бойынша сынға түсті.
Бұл жарыс облыс спортшылары үшін тек жүлде сарапқа салатын дода емес, Алматы облысының құрама командасына іріктеудің маңызды кезеңі болды. Үздік нәтиже көрсеткен каратистер 3–4 қазанда Астана қаласында өтетін республикалық жарыстарда өңір намысын қорғауға мүмкіндік алады.
Облыстық додаға спортқа енді қадам басқан жас каратистермен қатар, республикалық жарыстарда тәжірибе жинақтаған спортшылар да қатысты. Алматы облысының киокушинкай-кан каратэден аға жаттықтырушысы Бекжан Сүнбековтің айтуынша, әр жас санатындағы спортшыларға қойылатын талап та әртүрлі.
«10–11 жастағы ең жас каратистерде жекпе-жек мәдениеті біртіндеп қалыптасады. Олар дұрыс қозғалу, эмоцияны бақылау, тактиканы сақтау және қарсыластан қаймықпауға үйренеді. 12–13 жаста техника мен тактиканың маңызы артады. Ал 14–15 жаста облыстық чемпионат спортшының дайындығын, физикалық төзімділігін және тактикалық ойлауын айқындайтын маңызды сынаққа айналады. 16–17 жаста тұрақтылық, тәжірибе мен жоғары деңгейдегі бәсекеге дайындық алдыңғы орынға шығады», – деді Бекжан Сүнбеков.
Жарыста 14–15 жас санатында топ жарған Қарасай ауданының спортшысы Нұрсұлтан Белгожаев үшін бұл жеңіс Алматы облысының құрамасындағы орнын бекітуге мүмкіндік берген.
«Финалда төзімділіктің қаншалықты маңызды екенін ерекше сезіндім. Бұл жеңіс мен үшін өте маңызды болды, өйткені Алматы облысының құрама командасындағы орнымды бекітуге мүмкіндік берді. Алдағы уақытта ірі халықаралық жарыстарда туған облысымның қоржынына медаль салғым келеді», – деді жас спортшы.
Чемпионат қорытындысында ең көп алтын медальді Қарасай ауданының спортшылары жеңіп алды.
Ұлдар арасында өз жас және салмақ дәрежелерінде Сабит Қосанов, Ерсұлтан Қалижан, Дияс Мұхамеджан, Ұлан Мұқаммет, Ернұр Закарья, Ілияс Сағат, Сұлтан Марат және Исатай Қуатбаев үздік атанды.
Қыздар арасында Айлуна Быченко, Ұлболсын Борибай, Зере Бауыржанқызы, Жаннұр Үмітғали, Жаннұр Борибай, Баянсұлу Бақтыгүл және Айым Мелдебек жеңімпаздар қатарынан көрінді.
Енді облыстық жарыста үздік нәтиже көрсеткен спортшылар республикалық деңгейдегі додаға дайындықты жалғастырады.
