Алматы облысы әкімінің баспасөз қызметінің мәліметінше, жолдардың жаңаруы өңірдің көрікті табиғи орындарына жетуді жеңілдетіп, туристер ағынын арттыруға мүмкіндік береді. Сонымен қатар инфрақұрылымның жақсаруы жергілікті кәсіпкерліктің дамуына және тұрғындардың табысын арттыруға ықпал етпек.
Райымбек ауданындағы туристер жиі қызығушылық танытатын орындардың бірі – Көккемер жайлауындағы Текес сарқырамасы. Жергілікті тұрғындар Күркілдек деп атайтын сарқырама теңіз деңгейінен 3600 метр биіктікте орналасқан. Қарағайлы орман мен таулы табиғат қоршаған нысан «Нарынқол орман шаруашылығы» мекемесінің қарамағына кіреді.
Қазір Көккемер жайлауының кіреберісіндегі 21 шақырым жолға орташа жөндеу жүргізілуде. Жұмысқа 10 техника мен 25 қызметкер жұмылдырылған. Бүгінде жоспарланған жұмыстың 30 пайызы орындалды. Жолды толық жөндеу 2027 жылы аяқталады деп жоспарланған.
Шалкөде жайлауына апаратын жол да жаңартылып жатыр. Мұндағы жөнделетін учаскенің жалпы ұзындығы 32,5 шақырымды құрайды. Қазіргі уақытта 26 шақырым жолдың негізі дайындалып, 10 су өткізгіш құбыр ауыстырылған. Сондай-ақ 4 шақырымға асфальт төселді. Жобаның жартысынан астамы орындалып, жұмыстарды биылғы жылдың соңына дейін аяқтау көзделген.
Туристік әлеуеті жоғары тағы бір аумақ – Шұбартал жайлауы. Мұнда ұзындығы 28,5 шақырым болатын жол салынып жатыр.
Байынқол аңғарына қатынайтын 13 шақырым жолда да орташа жөндеу жұмыстары жүргізілуде. Қазіргі уақытта оның 30 пайызы аяқталған. Жоба аясында жол бойынан арнайы автотұрақ салу қарастырылған. Жөндеу жұмыстарын 2027 жылы толық аяқтау жоспарланып отыр.
Жол инфрақұрылымын жаңарту Райымбек ауданындағы туризмнің дамуына қосымша серпін бермек. Таулы аймақтарға қатынастың жақсаруы туристік бағыттардың қолжетімділігін арттырып қана қоймай, демалыс орындары мен сервистік қызметтердің дамуына да мүмкіндік бере
