Өңір қазынасына түскен қаражаттың басым бөлігін салықтық түсімдер құрайды. Қаңтар-тамыз аралығында салық есебінен облыс бюджетіне 445,3 млрд теңге түскен. Бұл жалпы кірістің 94 пайызына тең.
Салықтық түсімдер бойынша да өсім байқалады. Былтырғы сәйкес кезеңмен салыстырғанда олардың көлемі 49 млрд теңгеге немесе 12,4 пайызға артқан.
Бұл туралы Қаржы вице-министрі Ержан Біржанов Алматы облысының тұрғындарымен кездесу барысында мәлімдеді.
Бюджеттің меншікті кірістерінің артуы өңірде жиналатын салық пен басқа да түсімдер көлемінің ұлғайғанын көрсетеді. Соның нәтижесінде жергілікті бюджеттің басқа бюджеттерден бөлінетін трансферттерге тәуелділігі төмендейді.
Жалпы, 2026 жылдың қаңтар-тамыз айларында Алматы облысы бюджетінің кірісі өткен жылдың сәйкес кезеңіндегі шамамен 415,3 млрд теңгеден 475,3 млрд теңгеге дейін өскен. Оның 445,3 млрд теңгесі салықтық түсімдердің үлесіне тиесілі.
