Жоба кезең-кезеңімен жүзеге асырылады. 2026 жылы қуаты 30 мың тонна болатын алғашқы нысанды іске қосу жоспарланған. Ал болашақта кешеннің астықты кептіру қуатын 120 мың тоннаға дейін жеткізу көзделіп отыр.
Қазіргі уақытта құрылыс алаңында негізгі жұмыстармен қатар технологиялық жабдықтарды монтаждау жүргізілуде. Кешенді жабдықтау кезінде заманауи шетелдік технологиялар пайдаланылып жатыр. Жабдықтардың бір бөлігі Германиядан жеткізілсе, астық сақтауға арналған силостар Испаниядан әкелінген.
Экспорттық әлеуеті артады
Жаңа кешен ауыл шаруашылығы тауар өндірушілеріне жиналған өнімді сапалы кептіруге, сақтауға және әрі қарай тасымалдауға мүмкіндік береді. Бұл өнімнің сапасын сақтап қана қоймай, өңірдің ауыл шаруашылығы саласындағы өндірістік инфрақұрылымын дамытуға ықпал етпек.
Жобада логистика мәселесіне де ерекше назар аударылған. Алдағы уақытта кешенге қажетті инфрақұрылымды күшейту мақсатында ұзындығы шамамен 3 шақырым болатын теміржол желісін дамыту жоспарланып отыр.
Кешен толық іске қосылғаннан кейін өнімді ішкі нарықпен қатар шетелге де жөнелту мүмкіндігі қарастырылған. Атап айтқанда, Өзбекстан, Тәжікстан, Ауғанстан және басқа да елдерге экспорттау жоспарланып отыр.
30 тұрақты жұмыс орны ашылады
Жаңа өндірістік нысанның әлеуметтік маңызы да бар. Кешен іске қосылғаннан кейін шамамен 30 тұрақты жұмыс орнын ашу көзделген.
Ауқымды инвестициялық жоба Еңбекшіқазақ ауданының аграрлық және логистикалық әлеуетін арттырып, ауыл шаруашылығы өнімдерін сақтау мен экспорттаудың жаңа мүмкіндіктерін қалыптастыруға бағытталған.
