Чемпионатқа 15 ерлер командасы мен 45 спортшы қатысты. Олардың арасында 39 ер адам, 6 әйел және 2 жасөспірім бар.
Жарыс бағдарламасы бірнеше күрделі жаттығудан тұрды. Қатысушылар 900–1200 метр биіктіктен секіріп, белгіленген нүктеге дәл қону бойынша сынға түсті. Сондай-ақ 2200–2500 және 2500–3000 метр биіктіктен жеке және топтық акробатикалық секірулер орындады.
Чемпионат барысында спортшылар барлығы 400-ден астам парашюттік секіру жасады.
Нәтижелерді барынша дәл әрі объективті анықтауға ерекше назар аударылды. Қону нәтижелері электронды жүйе арқылы тіркелсе, жеке акробатикалық жаттығуларды бағалау кезінде арнайы оптикалық құрылғылар қолданылды.
Жарыс жетекшісі, подполковник Азамат Әбдірайымовтың айтуынша, чемпионат жоспарға сәйкес өткен.
«Жарыс бағдарламасы толық орындалды. Авиациялық және басқа да қамтамасыз ету түрлеріне байланысты секірулер тоқтатылған жоқ. Чемпионаттың барлық кезеңі штаттық режимде өтті», – деді ол.
Үздік парашютшілер анықталды
Чемпионат қорытындысында жекелеген жаттығулар бойынша Қазақстан Қарулы күштерінің Парашюттік даярлық орталығының әскери қызметшілері Денис Исламов, Мирас Сейітжапаров және Жақсылық Ерназар жеңімпаз атанды.
Жарыс спортшылар үшін тек жүлде сарапқа салынған дода ғана емес, кәсіби деңгейін көтеруге мүмкіндік берген алаң болды. Қатысушылар үшінші разрядтан бірінші спорттық разрядқа дейінгі нормативтерді, сондай-ақ жеке дәлдікпен қону жаттығуы бойынша спорт шеберлігіне кандидат нормативтерін орындады.
Чемпионат нәтижесі бойынша парашют спортынан Қазақстан Республикасы мен Қарулы күштердің құрама командалары жасақталады. Іріктелген спортшылар алдағы уақытта халықаралық жарыстарда ел намысын қорғайды.
