Жобаның негізгі мақсаты – аға буын өкілдеріне құрмет көрсету, жалғызбасты қариялар мен ардагерлерге жан-жақты қолдау білдіру. Сонымен қатар бастама жастар арасында үлкенге ізет, мейірімділік, жанашырлық пен азаматтық жауапкершілік құндылықтарын қалыптастыруды көздейді.
Акция аясында еріктілер қариялардың шаңырағына арнайы барып, олардың тұрмыс-тіршілігімен танысады. Жастар азық-түлік себеттерін табыстап, үй ішін жинауға, ауланы тазалауға және күнделікті тұрмыста қажет жұмыстарды атқаруға көмектеседі.
Ұйымдастырушылардың айтуынша, мұндай кездесулердің әлеуметтік қолдаумен қатар тәрбиелік маңызы да зор. Жастар аға буын өкілдерімен әңгімелесіп, олардың өмірлік тәжірибесі мен ақыл-кеңесін тыңдайды. Бұл өз кезегінде ұрпақтар арасындағы байланысты нығайтып, жастардың үлкенге деген құрметін арттыруға ықпал етеді.
«Жастар рухы» белсенділері ардагерлер мен қарияларға құрмет көрсету бір реттік шарамен шектелмеуі тиіс екенін атап өтті. Олардың пікірінше, қоғамда қайырымдылық пен қамқорлық мәдениетін қалыптастыру үшін мұндай бастамаларды тұрақты түрде жалғастыру маңызды.
«Ардагерлерге құрмет көрсету – баршаға ортақ парыз. Аға буынға қолғабыс ету арқылы жастар үлкенге деген сыйластығын сөзбен ғана емес, нақты іспен көрсете алады. Осындай игі бастамаларды тұрақты жалғастыру маңызды», – дейді акцияға қатысушылар.
«Ардагерлерді ардақтайық» жобасы Алматы облысымен қатар еліміздің өзге өңірлерінде де жүзеге асырылуда. Бастама аға буынға қамқорлық көрсетумен бірге жастарды қоғамдық жұмыстарға белсенді араластыруға, жауапкершілік пен өзара көмек құндылықтарын дәріптеуге бағытталған.
