Өткен жылдың қыркүйегінен бері облыстың он ауданында 325-тен астам интеллектуалды кешен мен 9 мыңнан астам бейнебақылау камерасы орнатылып, толыққанды жұмыс істеп тұр. Жүйе жол қозғалысын бақылаумен қатар, қоғамдық қауіпсіздікті қамтамасыз етуге және қылмыстарды жедел ашуға көмектеседі.
Камералар ғана емес, мобильді кешендер де жұмыс істейді
Жолдағы жағдайды бақылау стационарлық камералармен шектелмейді. Патрульдік полиция көліктері жол қозғалысы ережесін бұзу деректерін автоматты түрде анықтайтын мобильді кешендермен жабдықталған.
Арнайы қосымшаның көмегімен жол ережесін бұзған 94 мыңнан астам жүргізуші тоқтатылған. Ал биыл жыл басынан бері бейнебақылау жүйесінің көмегімен мыңға жуық қылмыс ізін суытпай ашылған.
Сонымен қатар тұрғындар көп жиналатын қоғамдық орындарда шұғыл жағдайда көмек шақыруға мүмкіндік беретін арнайы «дабыл түймелері» іске қосылды.
Облыстық Полиция департаментінің өкілі Ернар Сайдильдиннің айтуынша, жаңа технологияларды енгізудегі негізгі мақсат – адам өмірін сақтау. Цифрлық жүйелер өңірдегі жағдайды нақты уақыт режимінде бақылап, түрлі оқиғаларға жедел әрекет етуге мүмкіндік береді.
Жасанды интеллект полицияның жұмысын жеңілдетті
Жобаның маңызды ерекшеліктерінің бірі – жасанды интеллект технологияларын пайдалану. Алматы облысының Цифрлық технологиялар басқармасы «Сергекті» қарапайым бейнебақылау желісі емес, жиналған деректерді талдауға мүмкіндік беретін интеллектуалды жүйе ретінде бағалап отыр.
Жасанды интеллект әсіресе бейнежазбалардан қажетті нысанды іздеу кезінде полиция қызметкерлерінің уақытын үнемдейді.
Sergek Group басшысы Евгений Кимнің айтуынша, бұрын белгілі бір көлікті анықтау үшін операторларға бірнеше сағаттық бейнемұрағатты қолмен қарап шығуға тура келсе, қазір бұл жұмысты алгоритм атқара алады. Мәселен, жүйеге ақ түсті Toyota көлігін табу міндеті берілсе, технология тиісті белгілерге сәйкес келетін көлікті бейнежазбалар арасынан автоматты түрде іздейді.
Бұл мүмкіндік іздеудегі көліктерді анықтауға, қылмысқа қатысы болуы мүмкін тұлғалардың қозғалысын жедел тексеруге және төтенше жағдайларға әрекет ету уақытын қысқартуға көмектеседі.
«Ақылды өңірдің» цифрлық негізі
Жобаның алғашқы жылғы нәтижелері цифрлық технологиялардың жол қозғалысы мен қоғамдық қауіпсіздікті қамтамасыз етудегі рөлінің артып келе жатқанын көрсетеді.
9 мыңнан астам камераны бір инфрақұрылымға біріктіру полицияға жағдайды нақты уақыт режимінде бақылауға, құқық бұзушылықтарды автоматты түрде анықтауға және жиналған бейнедеректерді жасанды интеллект көмегімен талдауға мүмкіндік беріп отыр.
Жауапты мамандардың пікірінше, қалыптасқан цифрлық инфрақұрылым алдағы уақытта Алматы облысында «ақылды өңір» тұжырымдамасын дамытуға негіз болмақ.
