Қаладағы тозығы жеткен 2,3 шақырым құбыр «Энергетикалық және коммуналдық секторларды жаңғырту» ұлттық жобасы аясында ауыстырылып жатыр.
Жобаны жүзеге асыруға қажетті қаражат Үкімет резервінен бөлінген. Қазіргі уақытта құрылыс алаңында 40-қа жуық жұмысшы мен 15 арнайы техника жұмылдырылған. Жауапты мамандардың мәліметінше, жұмыстардың 53 пайызы аяқталды. Жаңа құбырларды жылыту маусымы басталғанға дейін толық төсеу жоспарланып отыр.
«Қонаев қаласында 2026–2027 жылғы жылыту маусымына дайындық шеңберінде екі жоба іске асырылуда. Жаңартылатын желілердің жалпы ұзындығы – 2,3 шақырым. Құрылыс жұмыстары Қонаев, Сейфуллин және Абай көшелерінде жүргізіліп жатыр. Қонаев пен Сейфуллин көшелерінің қиылысындағы 500 метр және Сейфуллин мен Абай көшелері аралығындағы 1,3 шақырым аумаққа диаметрі 630 миллиметрлік құбыр төселеді. Ал Абай көшесіндегі 500 метрлік учаскеге диаметрі 426 миллиметр болатын құбыр орнатылады. Қазіргі таңда жұмыстың 53 пайызы аяқталды», – деді «Қонаев жылу орталығы» МКК директоры Ержан Шоқан.
Жаңғыртылып жатқан магистральді желілер арқылы қаладағы көпқабатты тұрғын үйлерге жылу жеткізіледі. Сондықтан инфрақұрылымның тозған бөліктерін ауыстыру жылумен қамту жүйесінің сенімділігін арттырып, жылыту маусымындағы апаттық жағдайлардың алдын алуға мүмкіндік береді.
Қаладағы инженерлік-коммуналдық инфрақұрылымды жаңарту жұмыстары алдағы уақытта да кезең-кезеңімен жалғасады.
