Сапар барысында инвесторлар ауданның сумен жабдықтау және су бұру жүйелерінің қазіргі жағдайымен танысты. Сондай-ақ қайта жаңғыртуды қажет ететін бірқатар инженерлік инфрақұрылым нысандарын аралап, олардың техникалық жай-күйін бағалады.
Алматы облысының энергетика және сумен жабдықтау басқармасының өкілдері инвесторларға Талғар ауданындағы инженерлік желілердің бүгінгі жағдайы туралы ақпарат берді. Кездесу барысында сумен жабдықтау және су бұру саласындағы өзекті мәселелер, қолданыстағы инфрақұрылымның мүмкіндіктері мен алдағы уақытта жүзеге асырылуы жоспарланған жобалар таныстырылды.
Өз кезегінде шетелдік инвесторлар Талғар ауданындағы сумен жабдықтау және су бұру жүйелерін жеке қаражат есебінен дамытуға және жаңғыртуға қызығушылық танытты. Тараптар ықтимал инвестициялық жобаларды жүзеге асыру мүмкіндіктерін талқылады.
Жұмыс сапарының негізгі мақсаты – ауданның инвестициялық мүмкіндіктерін зерделеу, инженерлік инфрақұрылымды жаңғыртуға жеке капитал тарту және болашақ жобалардың техникалық-экономикалық әлеуетін бағалау.
Инвестициялық бастамалар жүзеге асқан жағдайда Талғар ауданындағы сумен жабдықтау және су бұру жүйелерін кезең-кезеңімен жаңғыртуға, инженерлік желілердің сапасы мен сенімділігін арттыруға мүмкіндік туады.
