Жас жұбайлар учаскеге той киімдерін ауыстырмастан келген. Қалыңдық Асия ақ көйлекпен, ал күйеу жігіт Нұрбек классикалық костюммен өз таңдауын жасады.
Той киіміндегі жұп сайлау учаскесіне келген сәттен-ақ көпшіліктің назарын аударды. Учаске төрағасы жас жұбайларды шаңырақ көтеруімен құттықтап, жаңа отбасына ақ тілегін білдірді. Құттықтауға сол сәтте дауыс беруге келген тұрғындар да қосылды.
“Бүгін біз үшін ерекше күн. Тойдың арасында сайлау учаскесіне де келіп үлгердік. Шынымды айтсам, бір күні қалыңдық көйлегімен дауыс беруге келемін деп ойламаппын. Енді бүгінгі күннен осындай ерекше суреттер де естелікке қалады”, — деді Асия.
Дауыс бергеннен кейін жас жұбайлар сайлау учаскесінен шығып, той салтанатын жалғастыруға аттанды.
Осылайша, Нұрбек пен Асия үшін 23 тамыз қос бірдей маңызды оқиғамен есте қалмақ. Енді олардың отбасылық альбомында той суреттерімен қатар, қалыңдық көйлегі мен күйеу жігіт костюмінде сайлау учаскесінде түскен ерекше кадрлар да сақталады.
