Халықаралық жарыстарда Қазақстанның намысын қорғап жүрген жас чемпион сайлауға қатысуды азаматтық жауапкершілік деп санайтынын айтты. Ол дауыс бермес бұрын саяси партиялардың сайлауалды бағдарламаларымен танысып шыққан.
«Мен әр жарыста туған елім – Қазақстан Республикасының туын мақтанышпен көтеремін. Сондықтан еліміздің болашағы қандай болатыны мен үшін өте маңызды. Тек спортта ғана емес, сайлауда да алдын ала дайындық қажет. Сол себепті партиялардың сайлауалды бағдарламаларымен алдын ала таныстым. Бүгін саналы түрде таңдау жасау үшін келдім», – деді Толғанай Қасымхан.
Жас спортшының сайлауға қатысуы жастардың елдегі қоғамдық-саяси үдерістерге қызығушылық танытып, өз таңдауын жасауға ұмтылатынын көрсетеді. Әлемдік аренада ел намысын қорғап жүрген чемпион бұл жолы сайлау учаскесіне келіп, азаматтық таңдауын жасады.
Айта кетейік, бүгін Алматы облысында 1 042 987 азаматтың дауыс беруге құқығы бар. Оның ішінде кәмелет жасына толып, биыл алғаш рет сайлауға қатысу мүмкіндігіне ие болған 14 104 жас сайлаушы бар.
