Жаңа кәсіпорынның жылдық өндірістік қуаты 40 920 тоннаға дейін жетеді деп жоспарланған. Жобаның жалпы инвестициялық құны – 35,3 млрд теңге.
Кәсіпорын толық іске қосылғаннан кейін Қонаев қаласында шамамен 450 тұрақты жұмыс орны ашылады. Жоба ауыл шаруашылығы өнімдерін терең өңдеумен қатар, өңірдегі өндіріс көлемін ұлғайтуға және жаңа жұмыс орындарын құруға бағытталған.
Қонаев қаласының әкімі Асхат Бердіханов құрылыс алаңына барып, инвестициялық жобаның жүзеге асырылу барысымен танысты. Сапар барысында құрылыстың қазіргі кезеңі, нысанға инженерлік инфрақұрылым тарту және қажетті коммуникациялармен қамтамасыз ету мәселелері қаралды.
Қазіргі уақытта зауыт орналасатын 31 гектар жер телімі толық қоршалған. Сонымен қатар аумағы 10 мың шаршы метр болатын тоңазытқыш қоймасының құрылысы жүргізіліп жатыр.
Қала әкімі жобаның жүзеге асырылуына жергілікті атқарушы органдар тарапынан қажетті қолдау көрсетілетінін атап өтті. Әсіресе кәсіпорынды инженерлік инфрақұрылыммен қамтамасыз ету мәселесіне басымдық берілмек.
