Тағзым ету рәсіміне Қонаев қаласының әкімі Асхат Бердіханов, ақын-жазушылар, ардагерлер, зиялы қауым өкілдері және қала тұрғындары қатысты.
Абай Құнанбайұлы – қазақтың сөз өнерін биік деңгейге көтеріп қана қоймай, тұтас ұлттың ой-санасы мен рухани болмысына терең із қалдырған дара тұлға. Оның шығармалары адамды білім мен ғылымға ұмтылуға, адал еңбек етуге, ар-ұятты биік ұстауға, ел мен жердің қадірін түсінуге үндейді.
Ұлы ақынның «толық адам» туралы тағылымы, ғылым мен білімді дәріптеген ойлары, адамгершілік пен елдікке шақырған өсиеттері арада ғасырдан астам уақыт өтсе де өзектілігін жоғалтқан жоқ. Керісінше, уақыт өткен сайын Абай мұрасының тереңдігі мен тағылымдық мәні айқындала түсуде.
Ақын ескерткішіне гүл шоқтарын қою – ұлт руханиятының темірқазығына айналған Абайға деген құрметтің белгісі. Бұл ұлы тұлғаның есімін ұлықтаумен қатар, оның рухани мұрасын кейінгі ұрпаққа жеткізудің маңызын тағы бір мәрте айқындайды.
Абайдың сөзі – уақыт өткен сайын жаңғыра түсетін асыл қазына. Ал оның мол мұрасы – ұлтпен бірге жасайтын мәңгілік құндылық.
