Тергеу нұсқасына сәйкес, айыпталушы өзіне тиесілі иттердің қауіпті екенін біле тұра, оларды ұстау талаптарын сақтамаған. Прокуратура мәліметінше, аула тиісті деңгейде қоршалмаған және жануарларға қажетті бақылау жүргізілмеген. Соның салдарынан иттер сыртқа шығып кетіп, көшеде жүрген 11 жастағы балаға шабуыл жасаған.
Оқиға кезінде бала басынан, бетінен және денесінің басқа бөліктерінен ауыр жарақат алған. Қайғылы жағдайдың соңы кездейсоқ өтіп бара жатқан азаматтың араласуымен ғана тоқтаған. Ол баланы құтқару үшін шабуыл жасаған екі итті пышақтап өлтірген.
Сот отырысында жәбірленуші баланың анасы Екатерина Бурмистрова оқиғадан кейін ұлының өмірі түбегейлі өзгергенін айтты.
«Маған қоңырау шалып, иттердің ұлымды талап жатқанын хабарлады. Оқиға орнына жүгіріп барғанда баламның қан-жоса болғанын көрдім. Сол күннен кейін Максим тұйықталып кетті. Денесіндегі тыртықтарынан ұялады. Алда тағы бір пластикалық ота жасатуы қажет», – деді ол.
Ал айыпталушы өз кінәсін мойындамай отыр. Оның айтуынша, балалар иттерді өздері арандатқан, әрі күшіктердің мұндай ауыр жарақат салуы мүмкін емес.
Жәбірленуші тарап соттан айыпталушыдан шамамен 4,5 миллион теңге материалдық шығынды және 10 миллион теңге моральдық өтемақыны өндіріп беруді сұрап отыр.
Қазіргі уақытта айыпталушыға қатысты елден шықпау туралы қолхат түріндегі бұлтартпау шарасы қолданылған. Ол абайсызда адам денсаулығына ауыр зиян келтіру бабы бойынша сот алдында жауап беруде.
