Желіде тараған кадрларда қыздың қолына қару ұстап, кейіннен одан оқ атқан сәті бейнеленген. Осыдан кейін әлеуметтік желі қолданушылары қарудың шығу тегін анықтап, оның заңды пайдаланылғанын тексеруді сұрап, құқық қорғау органдарына жүгінген.
Алматы облысы полиция департаментінің мәліметінше, жүргізілген тексеру барысында бейнежазбаға қатысы бар азаматтардың барлығы анықталған.
«Тексеру нәтижесінде тегіс ұңғылы қарудың иесі оны басқа адамға бергені белгілі болды. Кейін әлгі азамат иесінің рұқсатымен арнайы белгіленбеген жерде оқ атқан», – деп хабарлады ведомство.
Полицияның мәліметінше, қаруды басқа адамдарға беру және оны арнайы белгіленген орындардан тыс жерде пайдалану қолданыстағы заң талаптарына қайшы келеді.
Осыған байланысты құқық қорғау органдары азаматтарды қаруды сақтау және пайдалану кезінде заң талаптарын қатаң сақтауға шақырды. Ведомство өкілдері мұндай құқық бұзушылықтар үшін қолданыстағы заңнамаға сәйкес жауапкершілік қарастырылғанын еске салды.
Полиция әлеуметтік желіде жарияланған кез келген құқыққа қайшы әрекет құқық қорғау органдарының назарынан тыс қалмайтынын және әрбір осындай дерек бойынша тиісті тексеру жүргізілетінін атап өтті.
