Өңір басшысы Мемлекет басшысы Қасым-Жомарт Тоқаевтың Ұлттық домбыра күніне қатысты айтқан сөзін еске алып, бұл мерекенің ұлттық рухты көтеріп, жас ұрпақтың бойына дәстүрлі өнер мен төл мәдениеттің құндылықтарын сіңірудегі маңызы зор екенін айтты.
«Домбыра – қазақтың жаны, тарихы мен тұтас болмысын бейнелейтін қасиетті мұра. Қос ішектен төгілген күйде халқымыздың ғасырлар бойы қалыптасқан рухы, дүниетанымы мен тағдыры жатыр», – деді Марат Сұлтанғазиев.
Облыс әкімі 1 шілдеден бастап күшіне енген жаңа Конституцияда тарихи-мәдени мұраны сақтау азаматтардың маңызды міндеті ретінде бекітілгеніне назар аударды. Оның айтуынша, бұл ұлттық құндылықтарды қорғауға бағытталған мемлекеттік саясаттың заңдық негізін күшейтеді.
Сондай-ақ өңірде дәстүрлі күй өнерін дамытуға ерекше көңіл бөлініп отырғаны атап өтілді. Бүгінде Алматы облысындағы өнер ұжымдары мен домбыра үйірмелері жас таланттарды тәрбиелеу бағытында жүйелі жұмыс жүргізіп келеді.
Әкімнің айтуынша, биыл облыс өнерпаздары Қытай, Марокко, Франция және түркі мемлекеттерінде өткен халықаралық мәдени іс-шараларда қазақтың ұлттық әуенін домбырамен орындап, ел өнерін лайықты таныстырып қайтқан. Бұл тәжірибе жас күйшілердің шығармашылық әлеуетін арттырып, өңірдегі дәстүрлі өнер мектебінің дамуына жаңа серпін беріп отыр.
Сонымен бірге өткен жылы ЮНЕСКО аясында кеңінен аталып өткен көрнекті композитор, Қазақстанның Халық қаһарманы Нұрғиса Тілендиевтің 100 жылдық мерейтойы да қазақтың күй өнері мен домбыра мәдениетінің халықаралық деңгейдегі беделін арттырған маңызды оқиға болғаны айтылды.
Құттықтау соңында Марат Сұлтанғазиев домбыраның қазақ халқы үшін жай ғана музыкалық аспап емес, ұлттың рухани тұтастығы мен тарихи жадын сақтайтын қасиетті мұра екенін атап өтті.
«Қасиетті қара домбыраның күмбірі ешқашан үзілмесін, күй өнері ұрпақтан ұрпаққа жалғасып, ұлттық аспабымыздың үні әлемге кеңінен тарай берсін», – деді облыс әкімі.
