Тиісті заң мәтіні Ақорда сайтында жарияланды.
Заңға сәйкес, антитеррорлық операция жүргізілетін аймақта операцияға қатысушы Мемлекеттік күзет қызметінің қызметкерлері мен әскери қызметшілері терроршыларға қарсы күш қолдануға, сондай-ақ қызметтік жануарларды, арнайы құралдарды, қару-жарақты, жауынгерлік және өзге де техниканы алдын ала ескертусіз әрі шектеусіз пайдалануға құқылы.
Құжатта бұл шаралар терроризм қатеріне жедел әрекет ету және қауіпсіздікті қамтамасыз ету мақсатында енгізілгені көрсетілген.
«Антитеррорлық операция жүргізу аймағында антитеррорлық операцияға қатысушы Қазақстан Республикасы Мемлекеттік күзет қызметінің қызметкерлері және (немесе) әскери қызметшілері терроршыларға қарсы күш қолдануға, қызметтік жануарларды, арнайы құралдарды, қаруды, жауынгерлік және өзге де техниканы осы Заңда және Қазақстан Республикасының өзге де заңдарында көзделген ескертусіз және шектеусіз қолдануға құқылы», – делінген заң мәтінінде.
Заңға 10 маусымда қол қойылған. Құжат алғашқы ресми жарияланған күнінен кейін күнтізбелік 60 күн өткен соң күшіне енеді.
