Ведомство мәліметінше, ЖК «Омаров», «Iceberg Distribution» ЖШС және «Ар Диас» ЖШС әлеуметтік маңызы бар азық-түлік өнімдерін төмен бағамен сатып алып, кейін оларды өзге сауда субъектілеріне 17 пайыздан 86 пайызға дейінгі негізсіз сауда үстемесімен қайта сатқан.
Аталған фактілер бойынша жоспардан тыс тексерулер жүргізіліп, заңнама талаптарын бұзған кәсіпкерлер әкімшілік жауапкершілікке тартылды.
Министрлік жыл басынан бері жүргізілген бақылау іс-шаралары нәтижесінде 171 сауда субъектісіне қатысты 643 әкімшілік хаттама рәсімделгенін растады.
Жалпы сомасы 3,4 миллион теңгеден астам айыппұл салынған.
«Оның 467-сі әлеуметтік маңызы бар азық-түлік тауарларына белгіленген шекті сауда үстемесін асыру фактілері бойынша толтырылса, 176 хаттама сауда қызметі туралы заңнама талаптарын бұзуға қатысты рәсімделді», – деп хабарлады министрліктің баспасөз қызметі.
Тексеру барысында бір сауда желісі, бір көтерме сауда орны және 11 сауда субъектісінің әлеуметтік маңызы бар азық-түлік тауарларына 40 пайыздан 203,8 пайызға дейін негізсіз үстеме қосқаны анықталған.
Мамандар мұндай әрекеттердің азық-түлік бағасының өсуіне тікелей әсер ететінін атап өтті.
Бағаны тұрақтандыру жөніндегі өңірлік комиссияның жұмысы аясында «Алтын Орда» базарындағы 13 сауда субъектісіне жоспардан тыс тексеру жүргізілген.
Нәтижесінде азық-түлік бағасының өсуіне ықпал еткен жеті тиімсіз делдалдың қызметі тоқтатылды.
Қазіргі уақытта өңірде өндірушілер мен ірі жеткізушілердің тізімі жасақталып жатыр. Сонымен қатар, электрондық шот-фактуралар арқылы делдалдық схемаларды анықтау және олардың жолын кесу жұмыстары жалғасуда.
