Іс материалдарына сәйкес, 2025 жылғы 23 қыркүйекте жеке құрамның қарумен жұмыс істеуі барысында пулеметтен абайсызда оқ атылып, салдарынан қатардағы жауынгер Сейтқали Ә. оқ жарақатын алып, көз жұмған.
Әскери прокуратураның мәліметінше, іс бойынша қадағалау барысында қайғылы оқиғаның барлық мән-жайын анықтауға және қажетті дәлелдемелерді жинауға бағытталған тергеу және процестік іс-шаралар толық көлемде жүргізілген.
Тергеу барысында батальон командирінің орынбасары қаруды пайдалану кезінде қауіпсіздік талаптарының сақталуын қамтамасыз етпегені анықталды. Сонымен қатар, ол бұған дейін өткізілген атыс жаттығуларынан кейін қаруды толық тексеруді ұйымдастырмаған.
Салдарынан қару ұңғысында қалып қойған оқ кейін оқыс атылып, әскери қызметшінің қаза болуына себеп болған.
Сот талқылауының қорытындысы бойынша аталған лауазымды тұлға Қазақстан Республикасы Қылмыстық кодексінің 453-бабы 2-бөлігімен («Ауыр зардаптарға әкеп соққан қызметке салғырт қарау») кінәлі деп танылды.
Сот үкімімен оған 4 жыл мерзімге бас бостандығынан айыру жазасы тағайындалды.
Айта кетейік, қазіргі уақытта үкім заңды күшіне енген жоқ.
