Жаңа нысан туристердің қауіпсіздігін арттыру және таулы аймақта туындауы мүмкін төтенше жағдайларға жедел әрекет ету әзірлігін күшейту мақсатында бой көтерген.
Құтқару пунктін дәл осы аумақта орналастыру туралы шешім өңірдің табиғи ерекшеліктерін ескере отырып қабылданған. Бұған дейін Төменгі Көлсай көлінде 1984 жылғы сел тасқындарынан кейін ашылған гидробекет жұмыс істеп келген. Алайда уақыт өте келе ғимарат заманауи талаптарға сай келмейтін болған.
Ашылу барысында мамандар Шелек өзені алабы өңірдегі сел қаупі жоғары аймақтардың бірі екенін атап өтті. Биік таулы аумақта мұздықтар, мұздақтар мен бөгеттік көлдер орналасқандықтан, тұрақты бақылау мен жедел әрекет ету аса маңызды.
Жаңа әмбебап құтқару пункті заманауи байланыс құралдарымен, мониторинг жүргізу жабдықтарымен, тәулік бойы кезекшілік атқаруға арналған үй-жайлармен және арнайы техникамен қамтамасыз етілген.
Нысанда құтқарушылармен қатар ҚР ТЖМ «Қазселденқорғау» мемлекеттік мекемесінің қызметкерлері жұмыс істейтін болады. Олар «Көлсай көлдері» ұлттық паркінің аумағындағы жағдайды тұрақты бақылап, туристердің қауіпсіздігін қамтамасыз етеді.
Айта кетейік, құтқару пунктінің құрылысы демеушілік қаражат есебінен жүзеге асырылған. Іс-шара барысында ТЖМ басшысы жобаны қолдаған кәсіпкерлерді ведомстволық медальдармен және алғыс хаттармен марапаттады.
