Жоба аясында сериал Ұйғыр ауданындағы Дардамты ауылында, Айлы және Қара шатқал аумақтарында, сондай-ақ Қонаев қаласындағы Іле өзенінің жағалауында түсірілуде.
Алматы облысының әкімі Марат Сұлтанғазиев түсірілім алаңына арнайы барып, жобаның жүзеге асырылу барысымен танысты. Аймақ басшысы шығармашылық топпен, техникалық құраммен және жобаға тартылған жергілікті тұрғындармен кездесті.
Облыс әкімінің айтуынша, мұндай халықаралық жобалар өңірдің креативті экономикасын дамытуға және туристік әлеуетін арттыруға оң әсер етеді.
«Қазіргі таңда Қарасай және Ұйғыр аудандарында халықаралық деңгейдегі фильмдер түсіріліп жатыр. Бұл жобалар креативті экономиканың дамуына үлкен серпін береді. Оңтүстік Корея компанияларының туындыларын әлем жұртшылығы қызығып көреді. Бұл сериал экранға шыққаннан кейін шетелдіктер Қазақстанның әсем табиғатын көріп, елімізге қызығушылық танытады. Соның нәтижесінде туристер саны артып, Алматы облысының халықаралық деңгейдегі танымалдығы күшейеді», – деді Марат Сұлтанғазиев.
Қазіргі уақытта түсірілім алаңында актерлер, каскадерлер, техникалық мамандар және жергілікті мердігер ұйымдар жұмыс істеуде. Сонымен қатар жоба аясында облыстағы қонақүйлер, қоғамдық тамақтану орындары мен көлік қызметтері кеңінен пайдаланылып жатыр.
Түсірілім жұмыстарына жергілікті тұрғындар да тартылған. Бұл өз кезегінде өңір халқы үшін қосымша жұмыс орындарын ашуға мүмкіндік беріп отыр.
Шығармашылық топ өкілдерінің айтуынша, Қазақстанның түсірілім алаңы ретінде таңдалуы кездейсоқ емес. Олар еліміздің табиғи ландшафтарының алуан түрлілігі мен кино түсіруге қолайлы ерекшеліктерін жоғары бағалайды.
Жобаның бас продюсері – Руслан Пак. Телехикаяны 2027 жылы көрерменге ұсыну жоспарланып отыр.
Мамандардың пікірінше, мұндай халықаралық жобалар Қазақстандағы креативті индустрияны дамытуға, шетелдік инвестиция тартуға және Алматы облысының туристік имиджін нығайтуға мүмкіндік береді.
