Жансая Нұрланқызы Ержан 2011 жылдың 17 желтоқсанында Алматы облысы, Іле ауданы, Ақши ауылында дүниеге келген. Ол 5 жасынан бастап Ақши ауылындағы №8 орта мектептің 1-сыныбына қабылданып, білім жолын туған ауылында бастаған. 12 жасынан бері бокспен тұрақты түрде шұғылданып келеді.
Жас спортшының алғашқы ірі жетістігі 2024 жылы бокстан Алматы облысының чемпионы атануы болды. Осы жеңісінен кейін республикалық чемпионатқа жолдама алған.
2025 жылдың қаңтар айынан бастап Жансая Алматы қаласындағы Шаңырақ шағынауданында орналасқан Олимпиада резервінің республикалық мамандандырылған мектеп-интернатына қабылданды. Сол жылы Шымкент қаласында өткен жарыста республика чемпионы атанып, кейін Иорданияның Амман қаласында өткен жасөспірімдер арасындағы Азия чемпионатында алтын медаль жеңіп алды.
Ал 2026 жылдың мамыр айында Өзбекстан Республикасының астанасы Ташкент қаласында өткен жасөспірімдер арасындағы Азия чемпионатында 80 келі салмақ дәрежесінде бақ сынап, финалда Үндістан өкілі Ваника Ванишканы жеңді. Осылайша Жансая Ержан бокстан жасөспірімдер арасындағы екі дүркін Азия чемпионы атанды.
Аудан басшысы жас чемпионды тарихи жеңісімен құттықтап, оның табандылығы мен еңбегі Іле ауданы жастарына үлкен үлгі екенін атап өтті.
Жансаяның жетістігіне ата-анасы Нұрлан мен Аясыл Сәрсенғалиева да зор үлес қосып келеді. Спортшыны кішкентайынан қолдап, тәрбиелеп отырған отбасы бүгінде аудан мақтанышына айналған.
Бүгінде Жансая — тек Іле ауданының ғана емес, бүкіл Қазақстанның мақтанышы. Оның жеңісі — қажырлы еңбек, тәртіп пен сенімнің жемісі.
