Бұл туралы Өңірлік коммуникациялар қызметінде өткен баспасөз мәслихатында Димаш Қожабеков мәлімдеді.
Оның айтуынша, өңірде санитарлық тазалау және стихиялық қоқыс орындарын жоюмен қатар, жеке инвестицияларды тарту арқылы қалдықтарды қайта өңдеудің заманауи жүйесін қалыптастыруға басымдық беріліп отыр.
Жоспарланған жобалар қатарында:
- электр энергиясын өндіретін қоқыс жағу зауыты;
- тағам қалдықтарын өңдеу кешені;
- қоқысты сұрыптау кешені;
- биоэлектр станциясының құрылысы бар.
Жобалар толық іске асқанда 300-ден астам жаңа жұмыс орны ашылады деп күтілуде.
Қазіргі уақытта облыста пластик, макулатура, шыны және тозған автодөңгелектерді қайта өңдейтін 6 ірі және бірнеше шағын кәсіпорын жұмыс істейді. Олар жыл сайын 184 мың тоннадан астам қалдықты сұрыптап, қайта өңдейді.
Атап айтқанда:
- пластик қалдықтарын P.T.Z.;
- макулатураны Kz.Recycling;
- шыны қалдықтарын Almaty Steklo және Qazaq Glass Company;
- тозған автодөңгелектерді Эко Технология мен Urban Core Beverly Hill Group компаниялары қайта өңдейді.
Сонымен қатар өңірде жаңа инвестициялық жобалар жүзеге асырылып жатыр.
Мәселен, Urban Core Beverly Hill Group компаниясы қалдықтарды қайта өңдеу өндірісін кеңейтуді жоспарлап отыр. Жобаның құны – 48 млрд теңге. Жаңғырту жұмыстарынан кейін кәсіпорын жылына 40 мың тоннаға дейін қалдық өңдей алады.
Ал Еңбекшіқазақ ауданында Гуандун Сучунь компаниясы құны 3 млрд теңге болатын қоқыс өңдеу зауытын салып жатыр.
Сондай-ақ Қарасай ауданында Kaz Waste Conversion компаниясы құны 15,5 млрд теңге болатын қалдықтарды сұрыптау және қайта өңдеу кешенінің құрылысын жүргізуде.
Бағдарлама аясында көгалдандыру мен экологиялық инфрақұрылымды дамыту жұмыстары да жалғасып жатыр. Жыл басынан бері облыста 103 мыңнан астам ағаш отырғызылған.
Қазір өңірде жалпы аумағы 69 мың гектардан асатын 20-дан астам экопарк жұмыс істейді. Сонымен қатар экологиялық және туристік аймақтарды дамытуға бағытталған жаңа жобалар қолға алынған.
Әкімдік мәліметінше, экологиялық құқықбұзушылықтардың алдын алу үшін облыс аумағында 9 мыңнан астам бейнебақылау камерасы орнатылған.
Ал 2026 жылы санитарлық тазалау жұмыстарына жергілікті бюджеттен 1,5 млрд теңге бөлінген.
