Аталған халықаралық іс-шаралар Азиядағы денсаулық сақтау саласындағы инновациялар мен инвестицияларды дамытуға бағытталған жетекші алаңдардың бірі саналады.
Биыл 17-рет ұйымдастырылып отырған халықаралық медициналық көрмеге әлемнің түкпір-түкпірінен 300-ден астам компания мен ұйым қатысуда. Көрмеде биотехнология, медициналық техника, аурухана жабдықтары, зертханалық шешімдер, телемедицина, цифрлық денсаулық сақтау, оңалту және стартап жобалар бағытындағы заманауи технологиялар ұсынылып жатыр.
Көрме аясында роботтандырылған хирургия, виртуалды шындық (VR), сенсорлық және киілетін технологиялар, телемедицина, қартаюға қарсы және оңалту өнімдері секілді денсаулық сақтау саласындағы озық инновациялық шешімдер таныстырылуда.
Іс-шараға Ержан Сүлейменов бастаған Алматы облысының делегациясы да қатысып жатыр. Делегация құрамында өңірдегі бірқатар медициналық ұйымдардың директорлары бар.
Мамандар халықаралық тәжірибе алмасып, медициналық технологиялардың соңғы жетістіктерімен танысуда. Сонымен қатар денсаулық сақтау саласындағы әріптестік байланыстарды нығайту бағытында кездесулер өткізуде.
Жаһандық денсаулық сақтау бойынша Азия саммиті аясында әлемдік деңгейдегі сарапшылар, инвесторлар, ғылыми қауымдастық өкілдері мен бизнес көшбасшылары денсаулық сақтау жүйесін дамыту, инновацияларды енгізу және халықаралық ынтымақтастықты кеңейту мәселелерін талқылап жатыр.
