Қалалық полиция басқармасының мәліметінше, рұқсат етілмеген жерлерге қоқыс тастау, тұрмыстық қалдықтарды бейберекет жинау және іргелес аумақтарды күтіп ұстау қағидаларын бұзу деректеріне ерекше назар аударылып отыр.
Әкімшілік құқық бұзушылық туралы кодекстің 434-2-бабы — «Ортақ пайдаланылатын орындарды ластау» бойынша 28 құқық бұзушылық тіркелген. Салынған айыппұлдардың жалпы сомасы 959 920 теңгені құрады.
Сонымен қатар екі қала тұрғыны қоғамдық жұмыстарға тартылса, тағы сегіз әкімшілік іс сот қарауында жатыр.
Полиция қызметкерлерінің айтуынша, құқық бұзушылықтардың басым бөлігі жол жиегіне, тұрғын үй маңына, бос жатқан аумақтарға және демалыс орындарына қоқыс тастаумен байланысты.
«Құрылыс және тұрмыстық қалдықтарды контейнер алаңдарының маңына немесе тікелей көше бойына қалдыру деректері жиі тіркеледі», – деп хабарлады полиция өкілдері.
Бұдан бөлек, ӘҚБтК-нің 505-бабы — «Абаттандыру қағидаларын бұзу» бойынша жыл басынан бері 395 құқық бұзушылық анықталған. Бұл бойынша салынған айыппұлдардың жалпы көлемі 778 500 теңгеге жеткен.
Сондай-ақ полицейлер 38 ресми нұсқама беріп, тұрғындар мен кәсіпкерлер арасында 100-ден астам профилактикалық түсіндіру жұмыстарын жүргізген.
Құқық қорғау органдары профилактикалық шаралар тұрақты түрде жалғасатынын атап өтті. Полиция қызметкерлері қала тазалығы тек коммуналдық қызметтерге емес, тұрғындардың жауапкершілігіне де байланысты екенін еске салды.
Қонаев қаласының билігі тұрғындарды санитариялық талаптарды сақтауға, қоқысты рұқсат етілмеген жерлерге тастамауға және қоғамдық орындарға ұқыпты қарауға шақырды. Сонымен қатар құқық бұзушыларға айыппұлмен қатар қоғамдық жұмыстар секілді қатаң шаралар қолданылатыны ескертілді.
