Қайғылы оқиға 8 мамыр күні Талғар ауданындағы №2 «Саз Талғар» су қоймасында болған. Құтқару қызметіне хабарлама 112 желісі арқылы түскен.
Алдын ала мәлімет бойынша, кәмелетке толмаған балалар су айдынының жанында ересектердің қарауынсыз болған.
Төтенше жағдайлар департаментінің хабарлауынша, балалар суға абайсызда құлап кеткен. Мамандар аталған орынның шомылуға және демалуға мүлдем жабдықталмағанын атап өтті.
Оқиға орнына ТЖД құтқару бөлімшелерінің күштері мен техникалары жедел жөнелтілді. Іздестіру-құтқару жұмыстары барысында мамандар су астынан екі жасөспірімнің мәйітін тауып, жағаға шығарған.
Құтқарушылар су айдындарының маңында қауіпсіздік ережелерін қатаң сақтау қажеттігін еске салды. Әсіресе балаларды қараусыз қалдырмау маңызды екені айтылды.
