Алдын ала мәліметтерге сәйкес, оқиға түтін сорғыш құрылғыны тазалау кезінде болған. Компания дерегінше, жұмыс барысында жарылыс болып, артынша өрт шыққан. Соның салдарынан ғимараттың кейбір конструкциялары ішінара құлаған.
«Оқиға салдарынан екі адам көз жұмды, тағы бес адам жарақат алды. Оларға медициналық көмек көрсетілуде», – делінген компания хабарламасында.
Кәсіпорын өкілдері қаза тапқандардың отбасыларына және зардап шеккендерге қажетті көмек көрсетілетінін мәлімдеді. Апат орнында жедел қызметтер жұмыс істеп, салдарын жою шаралары жүргізілуде.
Компанияның мәліметінше, арнайы комиссия құрылып, жарылыстың себептері анықталып жатыр. Оқиғаның барлық мән-жайы тексеру қорытындысы бойынша белгілі болады.
Сондай-ақ уәкілетті органдар жарылыстың қоршаған ортаға әсерін де зерттеуде. Алдын ала деректерге сәйкес, рұқсат етілген шекті мөлшерден аспайтын шаң таралған, қауіпті ластаушы заттардың бөлінуі тіркелмеген.
