Жиында ономастика саласындағы заңнамалық өзгерістер, 2024–2028 жылдарға арналған жол картасының орындалу барысы және өңірде атқарылып жатқан жұмыстар сараланды. Кеңеске комиссия мүшелері, аудан әкімдерінің орынбасарлары, бөлім басшылары мен сала мамандары қатысты.
Отырыс барысында өңірдегі елді мекендердегі көше атауларын жүйелеу мен заң талаптарына сәйкестендіру мәселелері сөз болды. Мамандардың мәліметінше, өткен жылы Алматы облысында 678 көшеге атау берілген. Сонымен қатар атауы қайталанатын немесе мүлде атауы жоқ көшелер мәселесі кезең-кезеңімен шешімін тауып келеді.
Сондай-ақ 154 көшеге соғыс ардагерлерінің есімі берілгені айтылды. Бұл тарихи жадыны сақтау мен елдік құндылықтарды ұлықтау бағытындағы жұмыстардың бір бөлігі ретінде бағаланды.
Жиында ономастика саласындағы маңызды жаңалықтардың бірі де жария етілді. Енді жекеменшік білім беру ұйымдарына тұлғалардың есімін беру немесе атауын өзгерту үшін міндетті түрде облыстық ономастикалық комиссияның келісімі қажет. Бұл талап «Қазақстан Республикасының Тіл туралы» заңына енгізілген өзгерістер аясында жүзеге асырылып отыр.
Комиссия отырысында 181 көшеге атау беру туралы ұсыныстар қаралды. Ұсыныстар «Жер-су атаулары» және «Дәстүрлі атаулар» тізімдерінен іріктеліп алынған.
Жиында көше атауларының дұрыс жазылуын бақылау, аншлагтарды бірыңғай талапқа сәйкестендіру және заңнама талаптарының сақталуын күшейту мәселелеріне ерекше назар аударылды. Сонымен қатар түсіндіру жұмыстарын жандандыру, ономастикалық атауларды реттеу және бұл бағыттағы жұмысты жүйелеу бойынша нақты тапсырмалар берілді.
Мамандардың айтуынша, өңірде ономастика саласын жүйелеу және тарихи атауларды жаңғырту жұмыстары алдағы уақытта да жалғасады.
