Алатау жарық компаниясы АҚ мәліметінше, 10–13 наурыз аралығында Алматы қаласы мен облыс аумағында электр беру желілерінде жоспарлы техникалық жұмыстар жүргізіледі. Соған байланысты кейбір елді мекендерде жарық қысқа уақытқа өшірілуі ықтимал.
Мамандардың айтуынша, электр қуаты белгілі бір учаскедегі тұтынушыларды басқа электр энергиясы көзіне ауыстыру мүмкін болмаған кезде ғана өшеді.
Жоспарланған жұмыстар барысында электр желілеріндегі сымдарды бөгде заттардан тазарту, кейбір бөліктерін ауыстыру және басқа да техникалық шаралар жүргізіледі. Әдетте мұндай жұмыстарды жөндеу бригадалары 1,5–2 сағат ішінде аяқтайды.
Жөндеу жұмыстары көбіне таңғы сағат 08:00-ден кешкі 17:00-ге дейін жүргізіледі.
Айта кетейік, электр желілерін жаңарту жұмыстары Алматы облысында 9 наурызда басталып, 13 наурызға дейін жалғасады. Тұрғындарға электр жарығы өшуі мүмкін көшелер мен елді мекендердің тізімі алдын ала жарияланған.
