2025 жылғы 17–21 қараша аралығында Астана қаласында жаратылыстану-математика бағытындағы пәндер бойынша XVIII Президенттік олимпиаданың республикалық кезеңі өтті. Бұл білім бәйгесі – еліміздің ең үздік оқушыларының терең білімін, логикалық ойлау қабілетін және ғылыми ізденісін сынайтын маңызды зияткерлік дода.
Олимпиадаға еліміздің түкпір-түкпірінен іріктелген талапты оқушылар қатысып, өзара білім бәсекесіне түсті. Нәтижесінде Алматы облысының атынан қатысқан «Арыстан» мамандандырылған лицейінің 11-сынып оқушысы Утешкалиев Нұржан жоғары көрсеткішке қол жеткізіп, ІІ дәрежелі дипломмен марапатталды.
Бұл — оқушының табанды еңбегі мен ұстаздарының жүйелі дайындығының жемісі. Білімге құштар мұндай жастар еліміздің ғылыми әлеуетін нығайтып, болашақ жетістіктердің негізін қалайды.
Алматы облысы білім басқармасы Утешкалиев Нұржанды жеңісімен құттықтап, алдағы уақытта жаңа белестерді бағындыруына тілектестік білдіреді.
