Полиция департаментінің мәліметінше, күдікті Алматы облысының К. есімді тұрғыны, 1986 жылы туған.
«Күдікті Медеу ауданындағы бау-бақша серіктестігінің аумағында әйелді еш себепсіз соққыға жыққан. Қазір ол уақытша ұстау изоляторына қамалды. Қылмыстық іс «бұзақылық» (ҚР ҚК-нің 293-бабы) бойынша тергеліп жатыр», – деп хабарлады ведомстводан.
Күдіктінің өзі әйелге не себепті шабуыл жасағанын түсіндіре алмады. Соққы салдарынан әйелдің қабағы жарылып кеткен.
«Басымнан ұра бастады, қабағым жарылып кеткен. Сосын әрі қарай жүгіріп кетті. Полицияға бірден шағым түсірдік, бірақ бейнебақылау камераларын тексерген жоқ. Оның түрін есімде сақтап қалдым. Оқиға орнына полициядан ешкім келген жоқ, куәгерлерден жауап алмады», – деді зардап шеккен әйел.
