Өрт салдарынан жеті тұрғын үй мен сегіз шаруашылық нысан толықтай жанып кеткен. Құтқару қызметінің мәліметінше, тілсіз жауды ауыздықтауға 27 өрт сөндіруші және 10 техника жұмылдырылған. Алайда қатты желдің әсерінен өртті толықтай сөндіру сегіз сағатқа созылған.
Жанып кеткен саяжай аумағынан үш ер адамның денесі табылды. Олардың бірі көлік салонынан, ал екеуі аула аумағынан анықталған. Марқұмдардың жасы 54 пен 61 аралығында болғаны белгілі.
Куәгерлердің айтуынша, өртті сөндіруге ауыл тұрғындары да атсалысқан.
«Әйеліммен бірге күректерді алып жеттік. Көршілер де келді, бірі су әкелді, бірі қолына түскен затпен көмектесті. Бар күшімізді салып тырысқанымызбен, жалынды тоқтату мүмкін болмады», – дейді саяжай иелерінің бірі Владимир Панков.
Алматы облысының Төтенше жағдайлар департаменті өрт орнында сот-медициналық және өзге де сараптамалар тағайындалғанын хабарлады. Бастапқы тергеу барысында қасақана өрт қою арқылы қылмысты жасыру әрекетінің белгілері бары анықталған. Бұл дерек бойынша материалдар құқық қорғау органдарына беріліп, қылмыстық іс қозғалды.
Қазіргі таңда полиция қызметкерлері қаза тапқандардың бір-біріне туыстық қатысын және оқиғаның барлық мән-жайын анықтап жатыр.
