Бүгінде өңірде 348 жылыту қазандығы пайдаланылады. Оның ішінде 165-і қатты отынмен, 107-сі газбен, 44-і сұйық отынмен, 21-і электр қуатымен жұмыс істесе, 11 нысан орталықтандырылған жылу жүйесіне қосылған.
Алдағы маусымға қажеттілік көлемі анықталды: облысқа 2 181 тонна көмір, шамамен 1,94 млн литр сұйық отын және 98 текше метр газ қажет.
Қазіргі таңда өңірдегі барлық медициналық ұйымдарда отын сатып алу конкурстары аяқталып, жеткізушілер анықталды және келісімшарттар жасалды. Бірқатар медициналық мекемелер қажетті отын қорын алып үлгерді. Ал сұйық және қатты отынды жеткізу 1-15 қыркүйек аралығына жоспарланған.
Сонымен қатар қысқа дайындық аясында барлық нысандарда қысым сынақтары өткізіліп, техникалық жұмыстар жүргізілді. Қажетті жабдықтарға сервистік қызмет көрсетіліп, қазандықтардың ақаулы қосалқы бөлшектері ауыстырылды.
Жауапты органдардың мәліметінше, әлеуметтік нысандарды отынмен қамтамасыз ету мәселесі тұрақты бақылауда тұр. Жылыту маусымына дайындық жұмыстары белгіленген кестеге сай жалғасуда.
