Жобаны полиуретаннан, түрлі диаметрдегі пластик және коррозияға қарсы құбырлар шығаруға маманданған Қытайдың XINJIANG YIHONGFENG ENERGY TECHNOLOGY CO., LTD. компаниясы жүзеге асырады.
Өңір делегациясының өкілдерінің айтуынша, инвестор компания қазірдің өзінде Алатау қаласынан өндіріс алаңына арналған жер телімін сатып алған. Қазіргі таңда зауытты «Alatau» арнайы экономикалық аймағына енгізу және қатысу шарттары талқылануда.
«Бұл — өңір үшін стратегиялық маңызы зор өнеркәсіптік жобалардың бірі. Біз бизнестің қысқа мерзім ішінде өндірісін іске қосуына барынша қолайлы жағдай жасауды көздеп отырмыз», — деді Алматы облысының кәсіпкерлік басқармасы өкілі.
Жаңа өндіріс орнының іске қосылуы өңірде жаңа жұмыс орындарын ашуға және Қазақстанның импортты алмастыратын өнімге деген сұранысын қанағаттандыруға мүмкіндік береді. Сонымен қатар бұл жоба еліміздің өндірістік әлеуетін арттырып, инфрақұрылым саласындағы қажеттіліктерді өтеуге өз үлесін қоспақ.
