Шара барысында оқушыларға азаматтық қорғау саласының маңыздылығы түсіндіріліп, құтқарушы болудың артықшылықтары мен жауапкершілігі туралы ақпарат берілді. Сонымен қатар, тұрмыстық өрт қауіпсіздігі ережелері бойынша арнайы нұсқаулық өткізілді. Мамандар оқушыларға жылыту маусымында өрттің алдын алу жолдарын түсіндіріп, өрт сөндіргіш құралдарын дұрыс пайдалану әдістерін тәжірибелік түрде көрсетті.
Іс-шараның басты мақсаты – оқушылардың қауіпсіздік ережелері туралы білім деңгейін арттыру және азаматтық қорғау мамандығының беделін көтеру. Кездесу барысында жоғары сынып оқушылары Азаматтық қорғау академиясына түсуге үлкен қызығушылық танытып, төтенше жағдай мамандарына өз алғыстарын білдірді.
Алматы облысы ТЖД бұл бағыттағы ақпараттық-түсіндіру жұмыстарын жалғастыра отырып, жас ұрпақтың құтқарушы мамандығына деген қызығушылығын арттыруды көздейді.
