Су тасқынына қарсы шараларға қатысу тәжірибесі бар десанттық-шабуылдау әскерінің әскери қызметшілері ауыл тұрғындарына көмекке келді.
Жармұхамбет ауылында шамамен 10 000 адам тұрады. Өткен аптада ауа райының жылынуынан өзендегі су деңгейі көтеріліп, кей үйлердің аулаларына су кіре бастады. Іле ауданының әкімі шұғыл кеңес өткізіп, Қарулы күштердің Десанттық-шабуылдау әскерінің қолбасшысынан көмек сұрау туралы шешім қабылдады.
“Генерал-майор Алмаз Жұмақаев ауыл тұрғындарына көмек көрсету үшін 43 десантшыны жіберді. Олар өзен жағасын нығайту жұмыстарын жүргізді. Жармұхамбет ауылының тұрғындары шын жүректен алғыс білдіріп жатыр. Сонымен қатар, сарбаздарға жұмыс арасында ыстық тамақ берілді”, — деді Іле ауданы әкімінің орынбасары Алмас Букенов.
Екі күн ішінде тұрғын үйлерді су басудың алдын алу мақсатында 800 метрден астам аймақта су бөгеліп, 2500-ден инертті материал салынған қап төселді.
Айта кетейік, 2024 жылдың көктемінде Десанттық-шабуылдау әскерінің әскери қызметшілері Батыс Қазақстан облысында су тасқынына қарсы іс-шараларға қатысқан болатын. 300 десантшы Чапаев, Жайық, Теректі, Дарьин және басқа да аудан орталықтарындағы Жайық, Шаған, Деркүл өзендерінің жағаларын бекіту жұмыстарын жүргізді.
