ЮНЕСКО Бас директорының мәдениет жөніндегі орынбасары Найеф әл-Файездің айтуынша, домбыра тек қазақ халқының ұлттық аспабы ғана емес, әлемдік мәдениеттің маңызды құндылықтарының бірі саналады.
Оның сөзінше, 2014 жылдан бері домбырамен күй орындау өнері ЮНЕСКО-ның Адамзаттың материалдық емес мәдени мұрасының Репрезентативтік тізіміне енгізілген. Бұл шешім қазақтың дәстүрлі күй өнерінің халықаралық деңгейде мойындалғанының айқын дәлелі болды.
«Домбырамен күй орындау дәстүрі адамдарды өз тарихымен, мәдениетімен және бір-бірімен байланыстыратын бірегей өнер. ЮНЕСКО Қазақстанда ұлттық аспапты дәріптеу мен осы құндылықты кейінгі ұрпаққа жеткізуге бағытталған бастамаларды толық қолдайды», – деді Найеф әл-Файез.
ЮНЕСКО өкілі Қазақстанның ұлттық мәдени мұраны сақтау және насихаттау бағытындағы жүйелі жұмысына да жоғары баға берді. Оның айтуынша, ұйым қазақтың дәстүрлі музыкалық мұрасын сақтап, оны болашақ ұрпаққа жеткізуге бағытталған барлық бастамаларды қолдайды.
Айта кетейік, Ұлттық домбыра күні Қазақстанда жыл сайын шілденің алғашқы жексенбісінде аталып өтеді. Мерекенің басты мақсаты – халқымыздың дәстүрлі күй өнерін, ұлттық мәдениетін және рухани құндылықтарын кеңінен насихаттау.
