Алатау қаласы прокуратурасының мәліметінше, әйел 1980 жылы дүниеге келген. Алайда сол кезде анасы баласының тууын азаматтық хал актілерін тіркеу (АХАТ) органдарында рәсімдемеген. Соның салдарынан оның туу туралы куәлігі де, жеке басын куәландыратын құжаты да болмаған. Жылдар өте бұл мәселені шешу одан сайын қиындай түскен. Өйткені азаматшаның дүниеге келгенін растайтын медициналық құжаттар сақтау мерзімінің аяқталуына байланысты мұрағаттан жойылған. Осы себепті оның туу фактісін соттан тыс тәртіппен растау мүмкін болмаған.
Жеке басын куәландыратын құжаттың болмауы әйелдің негізгі құқықтарын жүзеге асыруына елеулі кедергі келтірген.
Атап айтқанда, жеке сәйкестендіру нөмірі болмағандықтан, ол өз мәселесін шешу үшін сотқа дербес жүгіне алмаған. Бұған дейін әпкесі арқылы жасалған әрекет те нәтиже бермеген. Сот оның әпкесі берген өтінішті қанағаттандырмаған.
Осылайша, азаматша өзінің дүниеге келгенін заң жүзінде дәлелдей алмай, жеке құжаттарын рәсімдеу мүмкіндігінен айырылған. Мәселенің мән-жайын зерделеген Алатау қаласының прокуратурасы азаматшаның құқықтарын қорғау үшін сотқа жүгінген. Қадағалау органы әйелдің туу фактісін заңды түрде анықтау туралы талап қойып, оның құжаттарын рәсімдеуіне құқықтық негіз қалыптастыруды сұраған. Нәтижесінде сот прокуратураның талабын қанағаттандырып, азаматшаның туу фактісін анықтау туралы шешім шығарды.
Бұл шешім 46 жастағы әйелдің жеке басын куәландыратын құжаттарын алғаш рет рәсімдеуіне жол ашты.
Сот шешімінің негізінде азаматша тиісті құжаттарын рәсімдеп, жеке сәйкестендіру нөмірін алу мүмкіндігіне ие болды. Бұл оның медициналық көмек алуына, ресми жұмысқа орналасуына, мемлекеттік және әлеуметтік қызметтерді пайдалануына құқықтық мүмкіндік береді.
Алатаудағы бұл жағдай жеке басын куәландыратын құжаттың азамат өміріндегі маңызын тағы бір мәрте көрсетті. Құжаттың болмауы адамның денсаулық сақтау, еңбек ету және әлеуметтік қолдау алу сияқты негізгі құқықтарын жүзеге асыруын қиындатады.
Прокуратураның араласуы нәтижесінде 46 жыл бойы шешілмей келген мәселе сот арқылы құқықтық шешімін тапты. Енді азаматша құжаттарын рәсімдеп, мемлекеттік қызметтерді заңды негізде пайдалана алады.
