Қазақстан Үкіметі су тасқынын болжау мақсатында батиметриялық зерттеулерге қаржы бөлді, деп хабарлайды alataunews.kz.
Президенттің су тасқынына дайындық жөніндегі тапсырмаларын орындау аясында Үкімет резервінен 576 миллион теңге қарастырылды. Бұл қаражат су ресурстары және ирригация министрлігіне бөлінеді. Негізгі қаржы жабдықтар мен техникалық құралдарды сатып алуға және зерттеу жұмыстарын жүргізуге жұмсалады. Әсіресе, «Қазсушар» ШЖҚ РМК «Су метрология» филиалы арқылы солтүстік, батыс және орталық аймақтардағы су тасқыны қаупі бар учаскелерде батиметриялық түсірілімдер жүргізу көзделіп отыр.
Республикалық маңызы бар су қоймаларында зерттеулер 2025 жылға дейін жалғасады. Жиналған деректер цифрлық даму, инновациялар және аэроғарыш өнеркәсібі министрлігі мен «Қазақстан Ғарыш Сапары» ҰК-ның ақпараттық жүйесіне су тасқынын болжау және модельдеу үшін беріледі.
